Psa 34 | KYG | STEP | Nagaemo Ala kava nefeke'mo muki afina'ae afina'ae'mo hao ke hegauve. Agi'ale'mo ali'na asaga huge huge hu'na maiguve.

Psalms 34

Fatago vaya'mogi ge nehageno Ala kava ne'mo'a ne'afiye, huno hu'niya gemae

1 Nagaemo Ala kava nefeke'mo muki afina'ae afina'ae'mo hao ke hegauve. Agi'ale'mo ali'na asaga huge huge hu'na maiguve. 2 Agi'ale'mo ali'na asaga hu'na atesuge'apae'mo apakufamo ali'a afepi ne'ataya vaya'mogi afite'apae'mo apamogaga aigae. 3 Nagaegi'e'mo hutae'mo, Ala kava ne'mo ala agi vekamo mai'niye, huta magokepi higetao. Agi'ale'mo magokepi alita asaga higetao. 4 Koli hu'na mai'ne'nae'mo naha maesiyafe'mo kahauya hu'na nunumu hu'nogeno afiteno'ae'mo naha mae'nige'na koli osu'na afa'a mai'nove. 5 Vaya'mogimo agete'apae'mo amuse hu'a mai'naya'mofe'mo ani kava hutapa agegeno'ao lapaipamo'mo kana osino. 6 Nagaemo lokiya vekamo o'mai'nova'mofe'mo agaefeke'mo keya ae'na ge hu'nogeno Ala kava ne'mo'a afi'niye. Afiteno'ae'mo muki hanageke yapati'mo nagufamo alino katino nate'niye. 7 Ala kava ne'mo enisole veka'amo'mo Ala kava nefe'mo koli nehaya vaya'aite'mo yagaino ku aino apateteno apakufamo alino katino ne'apate. 8 Ala kava ne'mo kanale vekamo mai'niye hutapa agegayanagi ageyo. Ala kava nepi'mo fala ki'a ne'maiya vaya'mo Goti aulagale'mo alagepa hu'a mai'nayanage'a afa'a apamogaga aigae. 9 Lapaote vaya'mo mai'nayanagi Ala kava nefe'mo koli hutetapa akame hiyo. Koli hute'a akame nehaya vaya'mogimo kafu osugae. 10 Laiyoni ana'aumogi apaka neteya'monanafa Ala kava ne'mo agesayafe'mo kahauya nehaya vaya'mogimo muki alagepa ya'mo alite'apae'mo kafu nosae.

11 Mafa'ne anaga'mogitapamo etapa ge'nimo afiyo. Ala kava nefeke'mo koli hutetapa akame hisaya kava'mo ali'na lapaya malegauvanagi eyo. 12 Alagepa hutapa yatala afina'mo mai'netapa lapamogaga aisayafe'mo lapau'nifiye. 13 Inagi lapau'nisiyana hosu gemo osuge aigofe gemo osuge hisayafe'mo alagepa hutapa yagaitapa lapateyo. 14 Hosu kavategati'mo maitapa halove hutapa eta alagepa kavake'mo hiyo. Kaveta osutapa alagepa hutapa magokepi lokaetapa maisayafe'mo kahauya hutapa vegala aeyo.

15 Ala kava ne'mo'a alagepa kava'mo nehaya vaya'aite'mo yagaino apate'neno aukaya hu'a ge nehaya ge'apimo ne'afiye. 16 Ne'afiya'monanafa hosu kava nehaya vaya'aife'mo kame huno ne'apatege'a fali'nageno'ae'mo ago apake nekaniye. 17 Fatago vaya'mogimo keya ae'a ge nehageno afiteno'ae'mo muki hanageke yapati'mo apakufamo alino katino ne'apate. 18 Ala kava ne'mo'a yulagefa ne'aiya vaya'ai hapaopale'mo mai'neno'ae'mo afepilagamo fale'a hai'a ne'maiya vaya'ai apakufamo alino katino ne'apate.

19 Alagepa vaya'mogimo lusi hanageke ya'mo ne'aliya'monanafa Ala kava ne'mo'a muki hanageke yapati'mo apakufamo alino katino ne'apate. 20 Ala kava ne'mo'a kanale vekale'mo alagepa huno yagaino ate'nigeno magoke ayamufamo alagi lo o'ae'niye. 21 Hosu vaya'mo hosu kava'apimo'mo apamagisige'a faligae. Alagepa kava'mo nehaya vaya'aife'mo nohapaiya vaya'mo kayo'mo apamigiye. 22 Ala kava ne'mo'a ali'ya'amo ne'aliya vaya'ai apakufamo miya faino alino katino ne'apate. Agaepi'mo e'a fala nekiya vayapati'mo magoke vekae'mo, hosu vekamo mai'nane, huno huteno alagi alino hafaino o'atalegaiye.